صدر مملکت آصف علی زرداری نے بھارت کی جانب سے سرحد پار شہری آبادی کو نشانہ بنانے کے واقعے کی پرزور مذمت کی ہے۔ اپنے بیان میں انہوں نے کہا کہ پاکستان بھارتی جارحیت کا بھرپور اور منہ توڑ جواب دے گا۔

صدر زرداری نے واضح کیا کہ بھارتی اشتعال انگیزی کا مقابلہ بھرپور طاقت اور پاکستان کی خودمختاری و علاقائی سالمیت کے تحفظ کے غیر متزلزل عزم کے ساتھ کیا جائے گا۔ انہوں نے کہا کہ شہری علاقوں کو نشانہ بنانا بلا اشتعال بھارتی حملہ بین الاقوامی قانون، اقوام متحدہ کے چارٹر اور پاکستان کی خودمختاری کی کھلی خلاف ورزی ہے۔

صدر مملکت نے کہا:

“پوری پاکستانی قوم اپنی بہادر مسلح افواج کے پیچھے متحد ہے۔”

ان کے بقول، بھارت کے بزدلانہ اقدامات ایک فاشسٹ حکومت کا اصل چہرہ بے نقاب کرتے ہیں۔ انہوں نے نشاندہی کی کہ بھارتی حکومت اپنے سیاسی ایجنڈے کو آگے بڑھانے کے لیے علاقائی امن و سلامتی داؤ پر لگانے کے لیے تیار ہے۔

صدر زرداری نے مزید کہا کہ پاکستان کی مسلح افواج مادر وطن کے ایک ایک انچ کے دفاع کے لیے پوری طرح تیار اور اہل ہیں، اور دشمن کی کسی بھی جارحیت کا بھرپور جواب دیا جائے گا۔