اسلام آباد، 13 اگست 2025 — آذربائیجان کے سفیر خازر فرہادوف نے ایوانِ صدر میں صدرِ مملکت آصف علی زرداری سے ملاقات کی، جس میں دونوں ممالک کے درمیان دو طرفہ تعلقات اور خطے کی صورتحال پر تبادلۂ خیال کیا گیا۔

صدرِ مملکت نے پاکستان اور آذربائیجان کے برادرانہ تعلقات کو مزید مستحکم کرنے کی ضرورت پر زور دیتے ہوئے کہا کہ یہ تعلقات دونوں ممالک کے عوام اور خطے کے مفاد میں ہیں۔ انہوں نے کہا کہ تجارت، معیشت اور علاقائی رابطہ کاری کو فروغ دینا وقت کی اہم ضرورت ہے، جبکہ براہِ راست فضائی روابط کے قیام سے تجارتی سرگرمیوں اور عوامی روابط کے نئے مواقع پیدا ہوں گے۔

صدر آصف علی زرداری نے آذربائیجان اور آرمینیا کے درمیان تاریخی امن معاہدے پر آذربائیجان کی قیادت اور عوام کو مبارکباد پیش کرتے ہوئے اسے خطے میں دیرپا امن، استحکام اور خوشحالی کی ضمانت قرار دیا۔

انہوں نے اس موقع پر کہا کہ پاکستان ہمیشہ تنازعات کے حل کے لیے بات چیت اور پرامن ذرائع پر یقین رکھتا ہے۔