پاکستان پیپلز پارٹی نے حکومتی رائٹسائزنگ کمیٹی اور نجکاری کمیٹی کے حوالے سے سنجیدہ اعتراضات اٹھائے ہیں۔ ان کمیٹیوں میں پاکستان پیپلز پارٹی کی نمائندگی چوہدری منظور احمد کر رہے ہیں، جنہوں نے ان امور پر تفصیلی تحریری کمنٹس جمع کروائے ہیں۔

چوہدری منظور احمد کا مؤقف ہے کہ ماضی میں اداروں کی نجکاری کے تجربات غیر شفاف اور مشکوک رہے ہیں۔ ان کا کہنا ہے کہ نجکاری کے بعد مسابقت کے بجائے کارٹلز بنے، جس سے اشیاء کی قیمتوں میں نمایاں اضافہ ہوا۔

انہوں نے خاص طور پر چینی، سیمنٹ اور گھی کے شعبوں کی مثال دیتے ہوئے کہا کہ نجکاری کے بعد حکومت نہ ان شعبوں کو ریگولیٹ کر سکی اور نہ ہی کوئی مؤثر کنٹرول قائم کر سکی۔ ان کا کہنا تھا کہ نجی شعبے کے حوالے کیے گئے اداروں میں نہ تو لیبر قوانین کا اطلاق کیا گیا اور نہ ہی کم از کم تنخواہ کے اصول کو نافذ کیا گیا، جس سے محنت کش طبقہ شدید متاثر ہوا۔