لاہور، 4 جون 2025 — صدرِ پاکستان جناب آصف علی زرداری نے گورنر ہاؤس لاہور میں ایک اہم اجلاس کی صدارت کی، جس میں گورنر پنجاب سردار سلیم حیدر بھی شریک تھے۔ اجلاس میں پاکستان پیپلز پارٹی (پی پی پی) کے سیکریٹری اطلاعات ندیم افضل چن، سابق اراکینِ اسمبلی ثانیہ کامران، عائشہ چوہدری، فائزہ ملک اور متعدد پارٹی کارکنان نے شرکت کی۔

اجلاس میں ملکی سلامتی، جاری آپریشن بنیان مرصوص، اور پارٹی کے داخلی امور پر تبادلہ خیال کیا گیا۔

صدر زرداری نے اس موقع پر خواتین کو بااختیار بنانے کے لیے پیپلز پارٹی کے عزم کو دہراتے ہوئے کہا کہ پارٹی نے ہمیشہ سیاست میں خواتین کی بھرپور حوصلہ افزائی کی ہے۔ انہوں نے کہا کہ ان کی اہلیہ شہید محترمہ بینظیر بھٹو خواتین قیادت کی علامت تھیں، جبکہ ان کی دونوں بہنیں بھی سیاسی میدان میں متحرک کردار ادا کر رہی ہیں۔

صدر مملکت نے کہا، "پاکستان پیپلز پارٹی نے خواتین کی فلاح کے لیے ہمیشہ عملی اقدامات کیے ہیں۔ بینظیر انکم سپورٹ پروگرام کا اجرا ہو یا سندھ ہاؤسنگ اسکیم میں خواتین کو ملکیت کے حقوق دینا، ہماری ترجیح ہمیشہ خواتین کا استحکام رہا ہے۔"