کراچی / اسلام آباد / لاہور: پاکستان پیپلز پارٹی کے چیئرمین بلاول بھٹو زرداری نے کوئٹہ کے علاقے نواں کلی کے قریب دہشت گردانہ دھماکے اور ضلع سوراب میں دہشت گردی کی شدید مذمت کی ہے۔ میڈیا سیل بلاول ہاوَس سے جاری کردہ پریس رلیز کے مطابق، پی پی پی چیئرمین نے دھماکے میں 2 افراد کے جانبحق ہونے پر افسوس کا اظہار کیا ہے۔ چیئرمین بلاول بھٹو زرداری نے ضلع سوراب میں دہشتگردوں کے حملے میں ایڈیشنل ڈپٹی کمشنر سوراب ہدایت اللہ بلیدی کی شہادت پر بھی افسوس کا اظہار کیا اور شہید افسر کو خراج عقیدت پیش کرتے ہوئے کہا کہ پاکستانی قوم ہدایت اللہ بلیدی شہید کی قربانی کو کبھی فراموش نہیں کرے گی۔ انہوں نے شہید ہدایت اللہ بلیدی کے اہلخانہ سے بھی دلی تعزیت و یکجہتی کا اظہار کیا ہے۔ چیئرمین بلاول بھٹو زرداری کا کہنا تھا کہ دشمن کے اشاروں پر خون کی ہولی کھیلنے والے کسی رعایت کے مستحق نہیں۔ انہوں نے کہا کہ پوری قوم دہشت گردی کے خلاف متحد اور دہشتگردوں کو نیست و نابود کرنے کے لیے پرعزم ہے۔