پیپلز پارٹی کا پی پی 52 سیالکوٹ میں شاندار انتخابی جلسہ، راجہ پرویز اشرف اور راحیل کامران چیمہ کا پرجوش خطاب

Editor

ایک سال قبل

سمبڑیال : پیپلز پارٹی نے پی پی 52 سیالکوٹ کے حلقے میں اپنی انتخابی مہم کا ایک بڑا جلسہ سمبڑیال کے جلسہ گراونڈ میں منعقد کیا، جس میں سابق وزیر اعظم راجہ پرویز اشرف، پیپلز پارٹی کے امیدوار راحیل کامران چیمہ اور دیگر قائدین نے خطاب کیا۔ جلسے میں شرکت کرنے والے جیالوں کا جوش و خروش دیدنی تھا، جبکہ سٹیج پر پارٹی کے پرچم اور نعروں کی گونج نے ماحول کو مزید گرم کر دیا۔

راجہ پرویز اشرف نے اپنے خطاب میں کہا کہ **"آج پیپلز پارٹی کا اصل رنگ سمبڑیال میں نظر آیا ہے۔ شہید بھٹو اور بی بی نے ہمیں مشکل حالات کا بہادری سے مقابلہ کرنے کی تربیت دی ہے۔"** انہوں نے زور دے کر کہا کہ **"مزدور، کاشتکار اور سرکاری ملازمین کا ساتھ صرف پیپلز پارٹی دیتی ہے۔ یکم جون کو صرف ترنگے کو ووٹ دیں۔"** انہوں نے حلقے کے عوام سے سوال کیا کہ **"کیا راحیل کامران چیمہ ہی وہ اہل امیدوار نہیں جو آپ کی خدمت کے لیے میدان میں آیا ہے؟"**

راحیل کامران چیمہ نے اپنی تقریر میں کہا کہ **"میں آپ میں سے ہی ایک ہوں، جو خدمت کے جذبے سے یہاں آیا ہے۔"** انہوں نے مخالفین کو متنبہ کرتے ہوئے کہا کہ **"اگر کسی نے ہمارے ووٹرز یا امیدوار کی طرف غلط نظروں سے دیکھا تو ہم اس کا ہاتھ توڑ دیں گے۔"** انہوں نے مزید کہا کہ **"یکم جون کے بعد پنجاب میں نیا سورج طلوع ہوگا، جو پیپلز پارٹی کی کامیابی سے روشن ہوگا۔"**

نوید انتھونی نے اپنے خطاب میں کہا کہ **"میں مزدور کا بیٹا ہوں اور بلاول بھٹو کے نعرے ’چلو نئی سوچ‘ کا عملی نمونہ ہوں۔"** انہوں نے زور دے کر کہا کہ **"راحیل چیمہ کو جتوا کر ہم پی پی 52 کے فرعونوں کو شکست دیں گے۔"**

چودھری یاسین نے جلسے سے خطاب کرتے ہوئے کہا کہ **"سمبڑیال والوں کا جوش دیکھ کر لگتا ہے کہ پنجاب بھٹو کا بننے والا ہے۔"** انہوں نے کہا کہ **"بھٹو کی ایٹمی طاقت اور بینظیر بھٹو شہید کے میزائل پروگرام کی بدولت ہی پاکستان محفوظ ہے۔"**

جلسے کے اختتام پر راجہ پرویز اشرف نے **"تیر تے مہراں ٹھکا ٹھک"** کے نعرے لگوائے، جبکہ جیالوں نے **"جئے بھٹو"** اور **"اے چور لٹیرے نسن گے"** کے نعروں سے جلسہ گاہ گونج اٹھی۔ جلسے میں چودھری یاسین، نوید انتھونی، احسن گھمن، اعجاز سمہ، محسن ملہی اور دیگر قائدین نے بھی خطاب کیا۔

جلسے کے دوران انتظامیہ اور الیکشن کمیشن سے مطالبہ کیا گیا کہ وہ پرامن انتخابات یقینی بنائیں۔ عوامی تحریک کے رہنماؤں نے بھی راحیل کامران چیمہ کی حمایت کا اعلان کیا۔ جلسے کے شرکاء نے یکم جون کو کھلے ووٹ ڈالنے اور پولنگ اسٹیشنوں کی حفاظت کرنے کا عہد کیا۔

Comments

No comments yet.

سب سے زیادہ پڑھا