پیپلزپارٹی کے چیئرمین بلاول بھٹو زرداری کا گلگت بلتستان میں ڈوگرہ راج کے دور کے بدنام زمانہ کالے قانون خالصہ سرکار کے خاتمے پر بیان
پیپلز پارٹی کی کامیابی: گلگت بلتستان کے عوام کو زمینوں کی ملکیت کا حق مل گیا، بلاول بھٹو زرداری نے مبارکباد دی
گلگت بلتستان کے عوام کو مبارکباد دیتے ہوئے پیپلز پارٹی کے چیئرمین بلاول بھٹو زرداری نے اعلان کیا ہے کہ آج کے دن گلگت بلتستان کے لوگوں کو ان کی زمینوں کی ملکیت کا حق حاصل ہو گیا ہے۔ انہوں نے کہا کہ ڈوگرہ راج کے دور میں نافذ کیے گئے بدنام زمانہ قانون "خالصہ سرکار" کا خاتمہ ایک تاریخی اقدام ہے، جو عوام کے حقوق کی بحالی کی طرف ایک اہم قدم ہے۔
بلاول بھٹو زرداری نے مزید کہا کہ شہید ذوالفقار علی بھٹو نے ملک میں لینڈ ریفارمز متعارف کروائے تھے، لیکن ڈکٹیٹر ضیاء الحق نے ان اصلاحات کو ختم کر کے گلگت بلتستان میں "خالصہ سرکار" کا ظالمانہ قانون نافذ کر دیا تھا۔ انہوں نے واضح کیا کہ "ناٹور قانون 1979" کے تحت لاکھوں افراد کو ان کے بنیادی حقِ ملکیت سے محروم کر دیا گیا تھا، جو آج ختم ہو گیا ہے۔
پیپلز پارٹی کے چیئرمین نے کہا کہ ان کی پارٹی کی گلگت بلتستان میں دہائیوں سے جاری حقِ ملکیت کی تحریک آخرکار کامیاب ہوئی ہے۔ انہوں نے حکومتی اتحاد کی تمام سیاسی جماعتوں کی تعریف کی جو اس بل کی حمایت کر رہی تھیں اور کہا کہ یہ اتحاد عوامی حقوق کے لیے سرگرم عمل رہا ہے۔ انہوں نے یقین دہانی کرائی کہ پاکستان پیپلز پارٹی ہمیشہ گلگت بلتستان کے عوام کے ساتھ کھڑی رہے گی اور ان کی خواہشات کے مطابق فیصلے کرتی رہے گی۔
اس تاریخی موقع پر بلاول بھٹو زرداری نے گلگت بلتستان کے لوگوں کو ان کی جدوجہد پر مبارکباد پیش کی اور کہا کہ یہ دن انصاف اور جمہوریت کی فتح کا دن ہے۔
No comments yet.